As enquisas de grupo son un tipo de contido que únicamente está dispoñible dentro dos grupos, é dicir, non é posible crear enquisas para uso individual.
As enquisas poden ser creadas polo(s) administrador(es) ou propietario(s) do grupo e as persoas integrantes do grupo poden participar en calquera momento en todas as enquisas creadas.
Desde o menú "Máis - Enquisas" podemos ver a listaxe de todas as enquisas creadas en todos os grupos nos que participamos e se entramos en calquera dos grupos aos que temos acceso, podemos acceder ás enquisas do grupo desde o menú de grupo e/ou desde o widget que se crea na páxina inicial de grupo.
Como se crea unha enquisa de grupo
En primeiro lugar, premer sobre o botón "Engadir unha nova enquisa".
A continuación móstrase o formulario de creación da enquisa no que se presentan os seguintes campos que deberemos cubrir:
- Título: Este é o título da enquisa, que se mostrará na listaxe de enquisas do grupo. Este campo está pensado para introducir un pequeno texto que identifique a esta enquisa. É un dato obrigatorio.
- Descrición: Neste campo introduciremos a pregunta ou a cuestión que desexemos consultar cos membros do grupo. Non é un campo obrigatorio, xa que poderíamos utilizar o campo "Título" para este mesmo fin.
- Respostas: Son os campos onde escribiremos as distintas opcións de resposta da enquisa. Cada vez que escribimos unha posible resposta, engádese un novo campo en branco para poder escribir máis opcións.
- Data de peche: Permite establecer unha data de peche da enquisa, de maneira que xa non será posible participar na enquisa despois desa data. Non é un dato obrigatorio xa que cada usuario só pode votar unha única vez e ninguén pode cambiar o seu voto despois de votar, polo que esta data está desactivada por defecto.
- Etiquetas: Da mesma maneira que calquera outro contido de Agueiro, as enquisas tamén poden etiquetarse como método de clasificación de contidos.
- Tipo de gráfico: Os dous tipos de gráficos dispoñibles para mostrar os resultados son: gráfico circular e gráfico de barras.
- Comentarios: Debes seleccionar esta opción se desexas permitir que os participantes na enquisa poidan escribir comentarios adicionais.
- Acceso: Por defecto, os únicos usuarios que teñen acceso á enquisa son os membros do grupo (Acceso = Membros) pero o creador da enquisa pode decidir asignarlle permiso de acceso "Privado" ou permiso de acceso "Usuarios rexistrados".
Despois de crear a enquisa, o seu aspecto será similar ao que se mostra na imaxe que aparece a continuación.
Despois de votar na enquisa, móstranse os resultados en forma de gráfico de barras ou gráfico circular, según as opcións seleccionadas polo creador da enquisa.
Na seguinte imaxe móstrase o resultado da enquisa en forma de gráfico circular.
