A STEM Discovery Campaign (SDC) é unha iniciativa internacional organizada por Scientix, parte de European Schoolnet, que se celebra cada ano de febreiro a abril e reúne a educadores, centros, proxectos, universidades, bibliotecas e clubs xuvenís para celebrar e dar visibilidade a actividades de ciencia, tecnoloxía, enxeñaría e matemáticas (STEM).
Durante a campaña, calquera actividade educativa relacionada co ámbito STEM —como obradoiros, proxectos escolares, seminarios web, festivais ou escenarios de aprendizaxe— pode rexistrarse nun mapa interactivo, o que permite á comunidade educativa descubrir, compartir e reproducir experiencias innovadoras. As persoas participantes tamén poden optar aos Premios Scientix, que recoñecen prácticas destacadas na educación STEM.
Amosar a actividade STEM que se realiza en Galicia dentro desta campaña é unha boa oportunidade para recoñecer e compartir o traballo que xa están a desenvolver moitos centros, docentes e entidades. Participar na STEM Discovery Campaign non só axuda a dar visibilidade a proxectos e experiencias educativas, senón que tamén permite conectar con outras comunidades que traballan con obxectivos semellantes en distintos lugares de Europa.
Neste sentido, o valor principal está en crear comunidade, algo que en Galicia xa se está a impulsar con iniciativas como a rede de clubs de ciencia, que fomenta a participación do alumnado, a aprendizaxe activa e o traballo colaborativo. Formar parte da campaña é, en definitiva, unha maneira de seguir construíndo xuntos unha educación STEM conectada, próxima e con vontade de compartir.