Nesta experiencia exploraremos a reacción química da cúrcuma en contacto co bicarbonato de sodio. Aprenderemos sobre a propiedade reactiva dalgúns alimentos de distinto pH.

Imaxe

Cesta de materiais

Preme nos puntos interactivos da imaxe.

Mans á obra

Esta experiencia precisa ser realizada en dúas partes, cun tempo de espera entre medio. 

Paso 1

 

• Elaboramos a primeira disolución.
• Nun vaso de aproximadamente 250 ml mesturamos a auga con dúas culleradas de bicarbonato.

 Paso 2

 

• Vertemos a disolución na bandexa para ter sitio e poder meter a man.

Paso 3

 

• Mollamos a palma da man e poñémola enriba da cartolina.
• Despois deste paso, xa podemos facer as primeiras hipóteses, preguntando ao alumnado que cren que vai ocorrer ao deixala secar.
• Podemos anotar estas hipóteses nun caderno, ou podemos dicirlles que debuxen o que cren que ocorrerá.

Imaxe

Imaxe propia. Momento no que se molla a man na disolución de auga e bicarbonato. (CC BY-SA)

Paso 4

 

• Deixamos secar a cartolina uns 15 minutos, ata que observemos que non hai demasiada humidade.

Paso 5

 

• Pasado o tempo de secado da primeira disolución, elaboramos a segunda, que será de cúrcuma e alcohol en xel.

Paso 6

 

• Mesturamos unha cullerada de cúrcuma en po cuns 100 ml de alcohol en xel.
• Se queremos ter unha disolución máis limpa de restos de cúrcuma, pódese coar cun coador de tea.
• Neste momento, pódense facer outra vez hipóteses, preguntando ao alumnado que cren que vai a pasar se pasamos o pincel con esa disolución pola cartolina que tiñamos a secar.

Paso 7

 

• Collemos a cartolina, mollamos o pincel na disolución de cúrcuma e pintamos sobre ela.

Paso 8

 

• Observamos a reacción que ocorre, centrando a atención do noso alumnado nas diferentes cores que aparecen.
• A cúrcuma vai tinguindo a cartolina de cor amarelo escuro, pero nos lugares onde está o bicarbonato tórnase amarronada porque lle cambia o seu pH natural. 

Imaxe

Imaxe propia. Reacción da cúrcuma en contacto co bicarbonato. (CC BY-SA)

 

 

Tips docentes

Os tips do profesorado son pequenas axudas para desenvolver a estratexia educativa de forma adecuada.

Antes de comezar o experimento falaremos brevemente sobre a cúrcuma.

Se temos a oportunidade levaremos un anaco de raíz natural (que se pode comprar nalgún supermercado). Darémoslla ao noso alumnado para que a poidan observar, tocar e ulir.  Explicarémoslle que é unha planta orixinaria do continente asiático, que se emprega para darlle cor e sabor aos pratos nalgunhas receitas de cociña. Centraremos a súa atención na cor. O compoñente que lle dá esa cor alaranxada chámase curcumina.

Podemos ensinarlle unha fotografía de como é a planta e precisar que o que se come é a súa raíz, como as cenorias.

 Na primeira parte do experimento recomendamos deixar secar a solución de auga con bicarbonato para conseguir un resultado máis nítido. Podería realizarse sen deixar secar, pero vanse mesturar as disolucións e non se apreciaría a reacción tan ben.

 Ao rematar o paso 3, pódeselle dar ao alumnado un pauciño con algodón e papel continuo, para que debuxen ou escriban coa disolución que queda sobrante.

  Ao rematar o paso 8, pódese coller o caderno onde anotaron as hipóteses que elaboraron no paso 3 e comentar se os resultados foron os que prevían. 

 Cando falamos do pH no punto 8, podemos explicarlle que o pH nos indica como de ácido é un alimento ou substancia. Poñendo como exemplo de moi ácido o limón e de totalmente contraposto en acidez o bicarbonato.

 Deixaremos seguir experimentando libremente ao alumnado cos debuxos que fixeron cos pauciños con algodón. Incluso se lle pode dar un pouco de zume de limón para que sigan experimentando como reacciona a cúrcuma.

A túa clase nun clic

Implementa esta microsecuencia na túa aula Moodle (Descarga dispoñible en galego ou castelán).

Imaxe

Imaxe