No marco do Día da Internet Segura 2024, o 6 de febreiro o Instituto Nacional de Ciberseguridade de España (INCIBE), xunto ao Instituto Nacional de Tecnoloxías Educativas e de Formación do Profesorado (INTEF) organiza entre outras actividades tres obradoiros dinámico-participativos de interese para a comunidade educativa.
Os obradoiros teñen o obxectivo primordial de axudar ao alumnado a desenvolver as súas competencias dixitais para un uso seguro e responsable da internet. Son gratuítos e realizaranse o 6 de febreiro de 2024 en dous pases - un de 10:00 a 11:00 e outro de 11:30 a 12:30 - a través da plataforma Zoom, sendo preciso inscribirse previamente nun dos dous horarios posto que as prazas están limitadas.
Obradoiro para alumnado de 6 a 8 anos: ‘Respecto e responsabilidade na internet’:
Trátase dun obradoiro de introdución á ciberseguridade e á forma de comunicarse con respecto e responsabilidade na rede. Axudará aos nenos e nenas a comprender a importancia do primeiro contacto coas funcións de comunicación dentro de plataformas educativas e videoxogos en liña, e a necesidade de fomentar o respecto e a responsabilidade, identificando e sabendo xestionar comentarios e contidos inapropiados.
Obradoiro para alumnado de 9 a 12 anos: ‘Protexe os teus dispositivos: aprende a realizar configuracións seguras’:
Trátase dun obradoiro interactivo sobre ciberseguridade co que axudar aos mozos a interiorizar hábitos cotiáns de protección para previr problemas de ciberseguridade cos nosos dispositivos e servizos en liña. O taller contribúe, ademais, a que os mozos entendan os avisos e as alertas de seguridade do dispositivo e dos servizos en liña para poder actuar adecuadamente, así como ensinarlles as opcións de configuración de seguridade e de privacidade nas principais plataformas educativas.
Obradoiro para alumnado a partir de 13 anos: ‘Gardiáns da contorna dixital: aprende a protexerte ante virus e fraudes’
Obradoiro interactivo sobre ciberseguridade no que os mozos practicarán a maneira de pasar un antivirus en liña antes de facer clic nunha ligazón, un arquivo adxunto ou unha descarga desde Internet. Á súa vez, poderán entender as mensaxes e avisos dun antivirus para poder actuar adecuadamente fronte a ameazas; e, por último, descubrirán como se forma unha URL para poder identificar ligazóns fraudulentas e non caer neles.
Para máis información e inscricións, consultar a web do INCIBE: https://www.incibe.es/eventos/sid/talleres-online
As bases legais dos obradoiros poden consultarse aquí: https://www.incibe.es/sites/default/files/2024-01/BasesGenerales_talleres_online_2024.pdf
