Unha experiencia educativa para unha alimentación sostible
Pulses Increase é un proxecto que combina ciencia, educación e sustentabilidade, inspirando ás novas xeracións a coidar o medio ambiente e mellorar os seus hábitos alimentarios. Para obter máis información sobre o proxecto ou acceder aos recursos dispoñibles, visita a súa páxina web: Pulses Increase.
O proxecto Pulses Increase é unha iniciativa europea financiada polo programa Horizonte Europa, que ten como obxectivo promover o cultivo e consumo de leguminosas, destacando o seu valor como un recurso clave para unha alimentación máis sostible e respectuosa co medio ambiente. As leguminosas, como os garavanzos, as lentellas ou os chícharos, destacan polas súas propiedades nutricionais, o seu papel fundamental no mantemento da saúde do solo e a súa contribución á redución das emisións de gases de efecto invernadoiro. Este proxecto pretende fomentar prácticas agrícolas innovadoras e sostibles que favorezan a biodiversidade e reduzan o uso de fertilizantes químicos.
Unha das accións destacadas de Pulses Increase é o seu enfoque educativo, que ofrece a oportunidade de integrar a experimentación científica nas aulas. A través de actividades prácticas, o alumnado investiga as propiedades das leguminosas como fixadoras de nitróxeno, o que lles permite comprender mellor os ciclos do solo e o seu impacto positivo no medio ambiente. Durante estas experiencias, realizan a plantación de leguminosas, rexistran observacións sobre o seu crecemento e analizan como melloran a calidade do solo en comparación con outros cultivos.0
O enfoque práctico permite conectar os contidos científicos coas problemáticas globais actuais, como o cambio climático, a perda de biodiversidade e a inseguridade alimentaria. Ademais, foméntase o pensamento crítico e o debate no alumnado, invitándoo a reflexionar sobre a importancia de adoptar hábitos de consumo máis responsables e sostibles. Estas actividades teñen un valor engadido ao relacionarse con áreas STEM, integrando ciencias, tecnoloxía e investigación nun mesmo proxecto.
Participar no proxecto non só beneficia ao alumnado, senón que tamén achega ferramentas ao profesorado para traballar competencias clave desde unha perspectiva innovadora. Ademais, permite que a mocidade se conecte coas necesidades reais do planeta, adquirindo conciencia do seu papel como axentes de cambio.