É posible ver e atrapar o Dióxido de Carbono (CO2)?

Nesta experiencia empregaremos a clara dos ovos para atrapar o gas que se produce da reacción química entre o vinagre e o bicarbonato. A textura de xel da clara de ovo permitiranos observar como o dióxido de carbono vai creando pequenas burbullas que van subindo polo recipiente no que se atopan, simulando un volcán de escuma.

Imaxe

Cesta de materiais

Preme nos puntos interactivos da imaxe.

Mans á obra

Paso 1

• Collemos os ovos e colocamos o dous recipientes á nosa beira para separar, coidadosamente, as claras das xemas.
• Nun recipiente depositamos as claras e noutro as xemas.
• Apartamos as xemas porque non nos van facer falta.

 Paso 2

• No recipiente onde están as claras engadimos unhas gotas de colorante e as dúas culleradas de bicarbonato.
• Mesturamos enerxicamente, ata que o colorante quede ben integrado coas claras.
• Observamos como a clara de ovo comeza a facer algo de escuma.

Imaxe

Imaxe propia. Mestura da clara de ovo co bicarbonato e o colorante. (CCO).

Paso 3

• Antes de engadir o vinagre facemos hipóteses sobre o que vai ocorrer.

Paso 4

• Engadimos o vinagre e centramos a atención na reacción que comeza.
• O vinagre ao entrar en contacto co bicarbonato, xera dióxido de carbono que queda atrapado na clara de ovo, e comeza a subir polo recipiente, a modo de volcán.

Imaxe

Imaxe propia. Momento no que comeza a inchar a clara de ovo. (CCO)

Paso 5

• Observamos como vai medrando a escuma, e as burbullas de dióxido de carbono que están atrapadas na clara de ovo.
  Imaxe

  
  Imaxe propia. Clara de ovo retendo todo o gas. (CCO).

 

Tips docentes

Os tips do profesorado son pequenas axudas para desenvolver a estratexia educativa de forma adecuada.

Con respecto aos materiais:

 Nos materiais recomendamos empregar as claras de dous ovos, polo tipo de recipiente que escollemos para realizar o experimento, pero non sería necesario. Podería usarse un só, ou incluso a clara de ovo que venden nalgún supermercado.

 Pódese empregar un vaso de tubo para observar a forza coa que sube a escuma polo vaso.

 Os colorantes empregados neste experimento foron en xel, pero tamén valen os líquidos, que se compran en supermercados. Non teñen outra función máis que darlle cor á mestura, e que os cativos poidan percibir visualmente mellor as burbullas de dióxido de carbono.

Orientacións metodolóxicas.

 No momento que se separe a clara da xema, é importante evitar que rompa a xema e se mesture coa clara. Podemos aproveitar este momento para centrar a atención do alumnado nas partes do ovo, facéndolle as seguintes preguntas:

• De que cor é a clara? De que cor é a xema?
• Cocestes algunha vez un ovo? De que cor se pon cada parte? Teñen a mesma textura unha vez cocidos?
• A clara e a xema teñen a mesma textura? Cal é a parte que ten textura de xel?
• Credes que o ovo contén auga? En que parte credes que a contén?...
• Que credes que pasa si batemos a clara de ovo? Pasa o mesmo si batemos a xema?

 Antes de comezar o experimento, sería interesante que os pequenos puideran tocar por separado as diferentes partes do ovo, para notar as texturas.

 No paso 2, cando comezamos a bater a clara do ovo para mesturala co bicarbonato e o colorante, centramos a atención do alumnado en que observe que lle vai pasando á clara, e podemos volver preguntarlles porqué se van facendo burbulliñas. 

 No último paso, momento de engadir o vinagre, para centrar a atención do alumnado na reacción que vai ocorrer, facemos unha síntese dos pasos que levamos feito e os ingredientes que engadimos no vaso ou recipiente. Volvemos provocar a creación de hipóteses a través de preguntas:

• Houbo algunha modificación da clara de ovo ao mesturala co bicarbonato?
• Que credes que vai ocorrer ao engadir o vinagre?...

 Engadimos o vinagre e permitiremos ao alumnado observar con atención, describir o que están a observar. Explicaremos o que ocorre e pedirémoslle que expresen coas súas palabras o que acaba de suceder. Que sexan eles os que verbalicen a reacción que acaban de presenciar permítenos aos docentes comprobar, que, e como o entenderon, e axúdalles a eles a adquirir os coñecementos que nós pretendemos que adquiran.

 Este experimento pódese realizar de forma individual por cada alumno, ou en grupo. Facelo individualmente tamén lle da a oportunidade de comparar reaccións diferentes.

Imaxe

Imaxe propia. Momento da reacción química e no que poden comparar entre eles. (CCO)

A túa clase nun clic

Implementa esta microsecuencia na túa aula Moodle (Descarga dispoñible en galego ou castelán).

Imaxe

Imaxe